- 564 -

1426. Jan. 26. Liegnitz.

Bürgermeister und Rathmannen bekennen, dass sie den Bischof Conrad von Breslau für den ihnen abgetretenen Bischofsgarten mit Besitzungen vor dem breslauer Thore entschädigt haben.

Wir burgermeister, ratmannen, schepphen, gesworne vnd dy gancze gemeyne der stad Legnicz bekennen vnd tun kunth allin, dy desen briff seen ader horen lesen, als der erenwirdige in gote vater vnd herre, her Conrad bisschoff czu Breslaw, vnser gnediger liber hirre mit rate vnd willen der ersamen hern des cappitels der kirchen zu Breslaw vns in eynem namen eyns wechsels dorch mogliches notczes vnd festenunge der stad Legnicz willen, hat lasen wedirfaren sinen vnd der kirchen garten, den syne gnade vnd syne vorfaren, bisschoff vnd dy kirche czu Breslaw von alders vnd off dese czeit habin gehabit vnd gerulichin besessen, das wir an demselben garten sinen gnoden vnd sinen nochkomen bischoffen vnd der kirchen czu Breslaw habin gegebin, vorricht vnd offgelosen, gebin, vffreichin vnd offlosen czu rechter kirchenfryheit vnd rechte dese hernochgeschreben erbe mit allin iren rechten, zugehorungen, fruchten vnd renten, wy man dy genennen moge, keyns owsgenomen vnd von allirley dinste fry vnd vmbeswert vnd auch von beczalunge allir vnd iglicher czinse, geschosse, stewer, betin vnd allirley beswerunge los vnd ledig. Czum ersten das hows vnd garten, das iczund Wenczlaw Bruckener hat vnd besitczet. Item der fleisscher schewne. Item der stad schewne. Item, dy hewser vnd garten, dy iczunt Bernhard Ebirhard habin vnd besitczen vor dem Breslawischen tore, awswenig dem slage gen Breslaw werth, off der rechten seiten gelegen, ewiglich czu haben, czu besitczen, czu vorwechseln vnd an eren notcz czuwenden, wy en das allirb eqwemste syn wirth. Der selbin hewser, erbe, garten vnd schewnen mit allen iren rechten vnd czugehorungen vnd frochtin habin wir vns vorczegen vnd vorczeihen von vnser vnd von vnser nochkomen wegin, inwonern der obgenanten stad vnd globin sy mit sampt vnsern nochkomen bey vnsem guten trawen vnd eren ane argelist ewiglich nymmer anczusprechen. Mit vrkunde dicz briues vorsegilt mit vnserm anhangenden stad segile, gebin am sonnabunde noch sant Pauls tage seiner bekorunge. Anno domini M°cccc°xxvj to.

Bitschens Geschossbuch p. 155.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866